Kabhi-kabhi lagta hai, hum poori zindagi duniya ko samajhne mein laga dete hain
kaun sahi hai, kaun galat, kisne kya kiya, kisne kya nahi kiya…
Aur phir ek din mann karta hai ki
thodi der ke liye sabko chhod kar sirf khud ko dekha jaaye.
Bina kisi judgement ke.
Bina khud ko justify kiye.
Bas observe kiya jaaye.
Tab shayad kuchh aisi cheezein bhi nazar aati hain, jinhe hum aam taur par ignore kar dete hain.
Pata chalta hai ki hum har baar utne patient nahi hote jitna hum samajhte hain.
Har baar utne understanding nahi hote jitna hum claim karte hain.
Kabhi-kabhi hum apni convenience ko principles ka naam de dete hain.
Kabhi apne ego ko self-respect samajh lete hain Aur insecurity ko intuition.
Overall, hum Shayad utne bhi acche nahi hote jitna hum khud ko claim karte hain.
Aur shayad ismein kuchh galat bhi nahi hai.
Insaan hona hi shayad thoda imperfect hona hai.
Mujhe lagta hai problem apni imperfections mein nahi hai.
Problem tab hoti hai jab hum unhe dekhna hi band kar dete hain.
Kyuki jis cheez ko hum honestly dekh lete hain,
usmein badlav ki possibility paida ho jaati hai.
Shayad isi liye khud ko observe karna, khud ko judge karne se bahut alag hai.
Judge karenge toh guilt milega.
Observe karenge toh understanding.
Aur understanding ke baad hi improvement naturally aata hai.
Shayad better insaan banne ka pehla step
better dikhna nahi,
balki khud ko thoda aur honestly dekh paana hai.
Kabhi-kabhi bas itna hi kaafi hota hai
thoda duniya se nazar hata kar,
khud par rakhna.
Wahan bhi ek poori duniya hai.
